Styð aðgerðir lögreglu

Ég verð nú bara að segja að ég styð aðgerðir lögreglu í þessu máli.

Mér finnst það með eindæmum vitlaust að ráðast gegn lögreglu með grjótkasti og hamagangi. Það er líka bara ofboðslega vitlaust finnst mér af þeim sem taka þátt í þessum aðgerðum um lækkun olíu/bensíngjalds og breytingu á hvídlartíma bílstjóra að hafa ekki hemil á sér, þegar ljóst er að lögreglan mun ekki sitja aðgerðarlaus þegar lög eru ítrekuð brotin, við að vekja athygli á þessu.

Hvað á lögreglan að gera annað en að bregðast við með viðeigandi hætti? Og þá spyrja einhverjir hvort það hafi verið viðeigandi að bregðast við með þeim hætti sem lögreglan gerði. Mitt svar við því er JÁ vegna þess að þeir sem á staðnum voru hunsuðu ítrekað fyrirmæli sem meðal annars fólu í sér skilaboð um afleiðingar þess að fara ekki eftir þeim. Lögreglan er ekki og hefur ekki verið óvinur þeirra sem hafa staðið í þessum aðgerðum, síður en svo. Gleymið ekki því.

Mín skoðun er reyndar sú að stærsta vandamál atvinnubílstjóra í þessum aðgerðum sínum sé talsmaður þeirra en hann er varla talandi maðurinn. Það eina sem hann virðist geta er að æsa sjálfan sig og aðra upp án þess að geta beinlínis stutt það. Því til stuðnings bendi ég á Kastljós í kvöld ásamt reyndar öllum öðrum viðtölum sem ég hef heyrt tekin við hann.

það er gott og blessað að efna til mótmæla vegna hinna ýmsu málefna og þessu ekki síður. En mótmæli sem helgast af því að hindra fólk, fólk sem þeir bera fyrir sig að þeir séu að berjast fyrir, í að komast leiðar sinnar, hvort sem það er á leið í skólann, vinnuna, til læknis, í jarðarför, í verslun eða hvert svosem fólk er að fara, er ekki að bera neinn árangur. Þvert á móti. Fyrir viku síðan studdi meira en hálf þjóðin þá í þessum aðgerðum. Í dag held ég að þeim hafi fækkað gríðarlega. Þeim fækkaði líka gríðarlega þegar myndir náðust af því að flutningabíll beinlínis ók í veg fyrir og reyndi að valda slysi á fólki í Ártúnsbrekku í síðustu viku.

Bílstjórar og aðrir sem vilja taka þátt í aðgerðum sem leitt gætu til þess að ríkið lækki álögur á bensín og olíu (sem reyndar er það lægsta hlutfallslega á norðurlöndum)! Finnið leiðir til að mótmæla með löglegum hætti og hætti sem virkar ekki öfugt á þá sem þið viljið ná til, almennings og yfirvalda. Þið eruð byrjaðir að vinna gegn ykkur sjálfum og þeim málstað sem þið berjist fyrir.

Lögreglan verður að vinna sína vinnu og það er ósköp einfalt að ef menn ekki fara að fyrirmælum lögreglu, þá mun hún beita því valdi sem hún þarf og hefur heimild til. Við hljítum að ætlast til þess af þeim.

Berið virðingu fyrir lögum og lögreglu. Það eru mín skilaboð um leið og ég vona að heimsmarkaðsverð á olíu lækki og að krónan styrkist gagnvart evru og dollara :)

21 handtekinn í dag

Athugasemdir

[Ólafur B. Jónsson (IP-tala skráð) 24.4.2008 kl. 01:17]

Alveg sammála Þorsteini Þorsteinssyni.  Það sem hann segir er rétt.

[Baldur Árnason (IP-tala skráð) 24.4.2008 kl. 04:30]

Gæti ekki verið meira sammála. Halda verður uppi lögum og reglu, þannig virkar þjóðfélagið.

[Anna Heiða Stefánsdóttir, 24.4.2008 kl. 10:21]

En á að taka bíl sem eru lagðir LÖGLEGA af því að bílstjórinn er talsmaður bílstjórana? Hafið þið farið hringinn og skoðað aðstæður bílstjórana? Lítil útskot sem eru á sumrin hertekin af húsbílum og hjólreiðarmönnum!

Snirtiaðstaða engin, vegagerðin hefur sagt þeim að nýta sér sjoppurnar og ef ílla fer að fara á næsta bóndabæ. Hef þetta frá fyrstu hendi. En hvað eiga þeir að gera á nóttuni? allt lokað og læst og menn sofandi nema þeir og löggan?

[Arna (IP-tala skráð) 24.4.2008 kl. 10:35]

heyr heyr ....