Þorrablót á Reyðarfirði

Átti ótrúlega góða helgi austur á Reyðarfirði um helgina þegar ég og Katla sys ákváðum ásamt frænkum okkar og fleiri góðum að skella okkur til æskustöðvanna á Þorrablót. Sjálfur hef ég aldrei komið á Þorrablót á Reyðarfirði en síðasta blót sem Katla sat þar var örlagaríkt kvöld í janúar 1984 svo fyrir okkur bæði var þetta töluverð upplifun.

En fyrst og fremst var alveg hreint æðislegt að hitta alla sem við hittum og við fundum það svo um munar hversu velkomin við vorum og erum ekkert lítið þakklát fyrir þessar móttökur sem við fengum. Þarna voru margir gömlu vinirnir, jafnaldrarnir, foreldrar þeirra og svo ungir en fullorðnir reyðfirðingar sem voru bara leikskólabörn þegar ég fór frá staðnum fyrir 25 árum síðan,....jafnvel ekki fæddir þá. Ótrúlega stór hópur fólks sem ég hef marga hverja ekki séð eða talað við svo árum eða áratugum skiptir en samt var bara eins og ég hefði alltaf verið þarna.........ótrúlega sterkar taugar sem maður getur haft til fólks og staða sem maður er ekki í daglegum tengslum við. 

Þetta er reyndar í annað skipti á innan við ári sem ég fer austur til að hitta fólk og dvelja í meira en nokkrar klukkustundir því ég fór þangað á árgangsmót síðasta sumar. Sama upplifun, sama tilfinning. Löngun til að búa þarna alveg ótrúlega mikil. Aðstæður hins vegar leyfa það ekki. Ég hef í mörg ár talið að ég myndi aldrei geta aftur búið í litlum bæ úti á landi,.......en svei mér þá, held bara að það sé akkurat það sem ég gæti og myndi bara líða vel. Kyrrðin og róin er svo mikil og maður er ekki 45 mínútur að komast keyrandi heim úr vinnu. En þetta eru nú mest draumórar í mér núna sem ég er að setja niður á blað. Eins og ég segi, aðstæður leyfa þetta ekki í dag og ekki næstu árin. Kannski getur maður í staðinn eytt einhverjum hluta sumarsins þarna :)

En þorrablótið var æðislegt og ekki ósennilegt að þetta verði endurtekið 2010. Það eina sem vantaði í ferðinni var að sjá glitský sem stundum sjást þarna,...allt annað fengum við, keyrðum meira að segja fram á stóra Hreindýrahjörð á leiðinni suður aftur, vorum bara í 100 m fjarlægð við þau :)

Já, mér þykir ekki lítið vænt um Reyðarfjörð og reyðfirðinga