Flugleiðir - Framhald af töskuvandræðum

Eins og ég sagði frá um daginn þá lentum ég og félagar mínir í vandræðum með farangurinn okkar á leið okkar til Barcelona, þ.e. hann týndist. Þeir fengu sínar töskur þó loksins rétt áður en við yfirgáfum Barcelona en mína vantaði enn.

Ég fékk hins vegar hringingu frá Flugleiðum í gærmorgun þar sem mér var tjáð að taskan væri komin til þeirra. Ég var spurður hvort ég vildi ekki fá hana og jú, auðvitað vill ég það. Sú sem hringdi tók þá niður símanúmer og heimilisfang og spurði mig hvort ég yrði ekki heima milli kl 19 og 21 sama dag, í gær semsagt. Jú sagði ég, ég verð heima. Flott, þá sendum við þér hana.

Klukkan 20:20 í gærkvöldi hringdi svo einhver drengur í mig og spurði hvort eitthvað hefði breyst, hvort ég hefði ekki örugglega viljað fá töskuna á Drekavelli í Hafnarfirði. Nei, sagði ég, ég vill ekkert fá hana þangað, ég vill fá hana heim til mín, á það heimilsfang sem ég gaf upp fyrr um daginn. Nú ok, segir hann. Einhver misskilningur. En hún er blá er það ekki, spyr hann. Uhh nei, hún er svört segi ég. Ó!, ehh heyrðu, hún er víst svört segir hann. Flott, þá renni ég henni til þín núna. Frábært segi ég og þakka fyrir. Taskan kom nú samt ekki og þessi gaur hringdi úr leyninúmeri svo ég gat ekki hringt til baka.

Ég hringdi hins vegar í Flugleiðir í morgun og spurðist fyrir um þetta eftir að hafa sagt þeim hvað gerðist í gærkvöld. Sú sem fyrir svörum var ætlaði að kanna málið strax og hringja í mig aftur. Hún hefur ekki enn hringt og vinnudeginum lokið á þeim bænum.

Taskan er samsagt ekki enn komin til skila og ég velti því fyrir mér hvort hún sé núna í Hafnarfirði. Gæti það verið???

Latabæjar-maraþon

Nú er ég búinn að vera heima með Óðinn veikan í tvo daga. Prinsinn greyndist með streptokokkosýkingu á föstudaginn var og ákvað að skella sér á hlaupabóluna með, svona úr því að hann ætlaði að verða veikur á annað borð. Hann byrjaði að láta á sjá á sunnudaginn og strax á mánudaginn var hann orðinn alþakinn bólum greyið.

Á meðan á þessum veikindum hefur staðið hefur hann gert lítið annað en að horfa á Latabæ á DVD. Aftur og aftur og aftur og aftur og aftur og aftur og aftur og aftur og aftur og aftur og aftur. Ég er farinn að kunna allar sögurnar utanaf. Verð nú bara að hrósa honum Magga Schev fyrir þetta, algjör snilld finnst mér :)

Núna er prinsinn byrjaður að hressast og ofaní heilsuáróðurinn í Latabæ ákváðum við feðgar að tími væri kominn á súkkulaðiköku sem í þessum töðuðu orðum er í ofninum og verður senn tilbúin. Okkur finnst súkkulaðikaka ekkert vond, sérstaklega ekki mér

Hann fer svo til mömmu sinnar núna á eftir og ég skelli mér í körfuboltann í kvöld.

Núna um helgina er svo pælingin að halda áfram með þetta blessaða eldhús sem ég hef sett á smá hold síðan um Jól. Fékk bara uppí kok af rykinu og drullunni af þessu blessaða gifsi og það get ég sagt að þetta er bæði í fyrsta og síðasta skipti sem ég vinn við gifsi. Aldrei aftur skal það verða og ræð ég hverjum sem er frá því að velja það framyfir spónarplötur.

Þurfti vísindamann til að komast að þessu?

Að sjálfsögðu hefur það góð áhrif á börn, unglinga og síðar fullorðið fólk að hafa verið og vera í góðu sambandi við báða foreldra. Það segir sig nú sjálft.

En svo segir vísindamaðurinn:

„Reyndar er ómögulegt að segja til um hvort það er vegna þess að feðurnir taka virkan þátt í uppeldinu eða vegna þess að móðirin getur betur sinnt uppeldinu ef hún hefur stuðning,“   

Ja hérna,......mér liggur við að skellihlægja.

Pabbar auka hamingjuna

Bannað að nota farsíma í flugi.....

.....en stundum bara verður maður að óhlíðnast smá

En það var svolítið gaman að prófa að kveikja á GPS staðsetningarkerfinu í fluginu á leið til Spánar, sjá svona hvernig þetta allt virkar um borð í Boeing 757 á cruising speed

Þessa mynd tók ég af Nokia N95 8GB símanum mínum með Nokia N82 símanum mínum. Myndin sýnir semsagt hvar við nákvæmlega vorum staðsettir þegar ég tók stöðuna yfir miðju bretlandi

Svo auðvitað kallaði ég fram upplýsingar um hraða, hæð og staðsetningu í breiddar- og lengdargráðum. Hraðinn var semsagt rúmlega 847 km á klukkustund í ca 12 km hæð

En þetta er auðvitað stranglega bannað sko

Ævintýraleg ferð til Barcelona

Jæja, nú sit ég á Kastrup flugvelli í Kaupmannahöfn að bíða eftir flugi heim. Það verður mjög gott að koma heim úr þessari ævintýralegu ferð á hina árlegu 3GSM farsímaráðstefnu í Barcelona.

Upphaf ferðarinnar var á mánudaginn þar sem við þurftum að fljúga í gegnum París á leið okkar til Spánar. Við létum Flugleiðir tékka töskurnar okkar alla leið en sjálfir þurftum við að tékka okkur aftur inn í París til að fá brottfararspjald. Flugstöðin í París er nú ekki beint sú skemmtilegasta til að bíða í en það slapp nú samt fyrir horn. Svo þegar við erum að tékka okkur inn, þá kemur í ljós að flugfélagið sem við áttum að fara með er ekki í neinum slíkum samningum svo miðað við þetta þá hefðum við aldrei fengið farangurinn okkar. Við þurftum því að fara aftur inn í Arrival svæðið, finna töskurnar okkar og koma svo aftur í check-in. Eini gallinn á því var hins vegar sá að innbókun átti að ljúka eftir hálftíma svo við urðum að hafa hraðar hendur.

Auðvitað voru töskurnar ekki þar sem þær áttu að vera svo það hófst leit. Sú leit var tekin á spretthlaupum dauðans með tilheyrandi rugli og veseni því það er skelfilegt að rata í þessari byggingu. Við þurftum að fara fram og tilbaka vegna ýmissa skráninga og við vorum komnir á alveg sérsamning hjá öryggisgæslunni,...sem kemur nú svolítið á óvart miðað við hvað frakkar eru ekki beinlínis vanir að sýna útlendingum einhvern sérstakan skilning þegar upp koma vandamál.

En semsagt, á endanum fengum við að vita að búið væri að finna 3 töskur af 4. Ein semsagt týnd og tröllum gefin, so far. Töskurnar áttu að berast okkur á mettíma svo við næðum nú fluginu örugglega en eftir töluverða bið var ljóst að þær kæmu ekki svo nú var staðan sú að við urðum bara að fara af stað án þeirra og láta senda þær með næsta flugi sem var nokkrum klst síðar. Vissum þó að amk ein taska væri týnd en vissum ekki hver þeirra það var. Við brunuðum af stað í check-in með eingöngu handfarangur og náðum fluginu.

Málið er nú svolítið þannig að það er ekkert æðislegt að vera á leið í viðskiptaferð, á ráðstefnu og vera eingöngu í gallabuxum, hvítum bol og strigaskóm. Hreint ekki spennandi tilhugsun og það var alveg ljóst að við myndum ekki ná til Barcelona fyrir lokun verslana. Allir fundir fyrsta daginn byrjuðu því á því að við vorum að afsaka útganginn á okkur. Allan daginn vorum við í sambandi við Flugleiðir vegna þessa en það verður ekki sagt að þeir hafi gert svo mikið sem að lyfta litla fingri við að aðstoða við að leysa úr þeirra eigin klúðri. Þeirra klúður var jú að bóka töskurnar alla leið þegar slíkt var hreint ekki í boði.

En semsagt, að loknum fyrsta degi á gallabuxunum þá rúlluðum við út á flugvöll því við höfðum fengið þær gleðifréttir að töskurnar þrjár væru komnar þangað. Air france ku hafa reddað því. Þegar við komum þangað kannaðist hins vegar enginn við neitt og engar töskur að finna þar. Þetta var þriggja tíma pakki. Við urðum því að bruna niðpur í bæ aftur og komast í verslun sem seldi allt. Þarna keypti ég jakkaföt, skyrtu, bindi, bol, skó, sokka, nærbuxur, raksápu, rakvél, deo og hárgel. Það allra nauðsynlegasta semsagt. 100 þúsund króna pakki takk fyrir. Mér var hins vegar hreint ekki skemmt því í töskunni minni voru annars vegar Boss jakkaföt og hins vegar Armani jakkaföt ásamt ýmsu öðru. 100 þúsund er því bara djók í þessu samhengi. Við komumst loksins til að fá okkur að borða klukkan 11 um kvöldið. Við vonuðum auðvitað að töskurnar myndu skila sér daginn eftir, á öðrum degi sýningarinnar. Það hins vegar gerðist ekki heldur :(

Kvöldið áður en við lögðum af stað heim, semsagt í gærkvöld, þá fengum við hins vegar símhringingu þess efnis að töskurnar þrjár væru komnar í leitirnar. Þess fjórðu vantaði hins vegar ennþá. Við vorum með veðmál í gangi hver ætti þessa tösku sem enn var týnd. Tryggvi var sá eini af okkur sem var með tvær töskur svo líkurnar voru honum í óhag. Ég gladdi hann þó með því að staða hans væri skárri fyrir þær sakir að ég er bara einstaklega óheppinn oft.

Þessu töskuævintýri lauk svo að mestu í morgun þegar við fórum frá Barcelona og fengum loksins töskurnar. Og ég reyndist sannspár, það var mín taska sem ekki var með. Og það veit enginn hvar hún er niðurkomin. Ég þarf því að fara að kanna hvað tryggingarnar dekka mikið af því tapi sem ég hef sannarleg orðið fyrir.

Á hinn bóginn var gaman í Barcelona, maturinn auðvitað geggjaður eins og alltaf, veðrið fínt og sýningin áhugaverð. Fórum svo í alveg svakalegt lokapartý hjá Nokia í gær þar sem margir frægir tróðu upp. Má þar nefna Robbie Williams, Kylie, Abba, Elvis Prestley og Freddie Mercury. Og ég er ekki að djóka,....alveg magnað show og engu líkara en að þarna væru þessar persónur í raun.

 

Maturinn var eins og ég sagði geggjaður og við fórum að sjálfsögðu á steikhúsið góða sem við fórum á í fyrra. Nautasteikin þar er bara einhver sú besta sem ég hef smakkað og það sem meira er, eftirréttirnar algjört namminamm og þeir sem mig þekkja vel vita að ég er mikill eftirréttamaður. Ég pantaði að sjálfsögðu 3 eftirrétti eins og svo oft áður, vanilluís, súkkulaðiköku og Créme brulei :)

Við sitjum núna á Kastrup semsagt að bíða eftir flugi en það er 6 klst bið á vellinum. Það verður mikið gott að koma heim, MIKIÐ GOTT.

  

Undanþágur

Æi ég vona nú að þessi læti verði ekki til þess að reykingar verði með öllu bannaðar í Leifsstöð. Ég er og var alltaf hlynntur reykingabanni á skemmtistöðum og veitingastöðum. En mér finnst nú svolítið annað með Leifsstöð því eftir að maður er kominn þangað inn, þá fer maður ekkert út aftur fyrr en í annað land er komið, nokkrum klukkustundum síðar. Og mér finnst það bara vera svolítið annað. Sumir segja líklega,...þér er nær að reykja. En halló, smá mannlegan þátt í þetta.

Hins vegar að það skuli vera reykherbergi í Alþingishúsinu finnst mér nú bara vera hneyksli og það af alvarlegri gerðinni því það eru fjöldamörg ár síðan lög voru sett á reykingar í húsakynnum hins opinbera. Að þau lög séu ennþá í dag brotin á hinu háa Alþingi, þar sem lögin eru sett er eiginlega bara alveg fáránlegt og sýnir nú reyndar bara hve eiginhagsmunasemi þingmanna er mikil. Setja lög á lýðinn en brjóta þau svo í æðsta embættishúsi þjóðarinnar. Eigum við að ræða það eitthvað eða.....??

Leyfa reykingar í mótmælaskyni

Ný hlið á MBL

Ekki að ég óski eigendum stólsins nokkurs annars en að finna hann,......en ég velti því samt fyrir mér hvernig FRÉTTAVEFUR mbl líti út ef allt sem stolið er af heimilum eða fyrirtækjum endar í fréttadálkunum þar sem lýst er eftir þeim? Hugsið ykkur t.d. myndaflóðið ef brotist væri inní Tölvulistann sem dæmi og þaðan stolið 6 mismunandi fartölvum, 18 vefmyndavélum, 10 hörðum diskum, 24 blekhylkjum og USB snúrum í tugatali.

Lýst eftir nuddstól

Hótel Hekla um helgina

Ekki verður annað sagt en að dvölin á Hótel Heklu hafi verið skemmtileg og áhugaverð líka. Við mættum á staðinn seinnipart laugardagsins eftir akstur á flughálum vegum landins. Það var svo hált að þegar ég prófaði eitt sinn að bremsa, þá bara gerðist ekkert. Þannig að það var farið varlega yfir. En á áfangastað komumst við öll, Ég og Ólöf, Gunni og Lena og svo Raggi og Anna Fríða.

Fyrst var bara slakað á fram að kvöldmat en matseðillinn var fyrirfram ákveðinn fyrir okkur. Góður matur og fín þjónusta. Það var reyndar svo að við vorum eina fólkið á staðnum svo við sátum ein að þjónustunni sem í boði var. Eftir matinn tók við fjör og kjaftagangur í koníaksstofunni langt fram á nótt en þá ákvað hópurinn að skella sér í heita pottinn. Og þá kemur einmitt þessi áhugaverði partur af ferðinni því ég byrjaði að skoða útum hvern einasta útgang af húsinu í leit að pottinum en hvergi fann. Loks spurði ég eigandann hvar hann væri og fékk þá svarið að hann væri 60 metra vestur af húsinu  Málið er að það var hríðarbylur úti, mikill snjór og mikið frost. Við ákváðum þó að láta okkur hafa það, skella okkur í skýlur og bikini og hlaupa í gegnum skaflana. Eftir að hafa staðið í dyrunum í drykklanga stund og horfa út í myrkrið í leit að pottinum, ákváðum við Gunni að hlaupa af stað í átt að þeim stað sem við töldum víst að potturinn væri. Sem betur fer reyndist það rétt og þangað komumst við kaldir og hraktir. Stelpurnar fylgdu svo á eftir og það var bara hreint frábært að liggja þarna í sjóðandi heitum pottinum í þessum bilaða veðri. En svo kom auðvitað að því að við þurftum að herða okkur uppí að fara til baka. Það tók amk 2-3 drykklangar stundir  En við komumst þó í land á endanum og ég held að allir hafi sofnað nokkuð vært eftir þessa raun.

Svo vöknuðum við á sunnudag og þá reyndist húsið rafmagnslaust og ekki nóg með það því rafmagnsleysinu fylgdi hitavatnsleysi þar sem rafmagnsdælur sjá um að dæla heita vatninu um húsið. Þetta þýddi að ekki var hægt að fara í sturtu og ekkert ristað brauð að fá í morgunmatnum  Og til að bæta gráu ofan á svart, þá fengum við þær fréttir að búið væri verið að loka Hellisheiðinni og hugsanlegt væri að Þrengslum yrði einnig lokað.

Húsráðandi var þó ekki í miklum vandræðum með að redda þessu með brauðristina

Allt fór nú á endanum vel og við komumst heim á skikkanlegum tíma.

Ég vil svo bara á endanum mæla með Hótel Heklu sem áfangastað í helgarferð í sveitina. Ótrúlega þægilegt andrúmsloft þarna, afslöppuð og góð þjónusta, góður matur og frábært umhverfi. Mæli hins vegar með því að ætli fólk í pottinn að nóttu til í hríðarbyl, að það kippi með sér stígvélum og sjóstakk

 

Helgin framundan

Komandi helgi verður klárlega tileinkuð landsbyggðinni því á morgun er ég að fara á ísfirðingamót, Sólarkaffi ísfirðinga. Að vísu verður það ekki á Ísafirði, ekki einu sinni á landsbyggðinni heldur nákvæmlega hérna í Reykjavík þar sem menn berjast um völdin í almennilegum fötum :)

En hvað er ég að gera annars á ísfirðingamót? Ekki er ég ísfirðingur. Hef meira að segja bara einu sinni á ævinni þangað komið og það var árið 1985. En jú, Ólöf er ísfirðingur og bauð mér með sér :) Hlakka nú bara heilmikið til verð ég að segja. Gæti meira að segja svo farið að ég hitti mömmu hennar þar. Spennandi :)

Nú svo á laugardaginn þá ætlum við að skella okkur út úr bænum, á hótel með nokkrum vinnufélögum mínum. Það verður BARA fjör.

En já, semsagt helgin verður tileinkuð landsbyggðinni í einu og öllu :)

IKEA farnir að selja bíla,........hvar stoppar þetta???

Verðið er reyndar ekki komið á hreint en þessi ku verða nokkuð ódýr og kemur í þremur litum.

Hérna er svo allt sem þarf

Já, það er greinilega allt á kafi.......

 

Mikið fannfergi í Vestmannaeyjum

Afmælisbörn dagsins

Í dag á hann sonur minn, Óðinn Örn 2 ára afmæli :D

ótrúlegt hvað tíminn flýgur en samt á hinn bóginn finnst mér hann hafa verið hluti af mér alltaf. Óútskýranlegt líklega :)

Hann fékk að sjálfsögðu fjarstýrðan bíl frá pabba sínum, hvað annað. Ég var svolítið hræddur um að það væri ekki tímabært,............en þetta er nú bara eitthvað sem ég gat ekki beðið öllu lengur eftir að gera. Hitt er svo reyndar annað mál að þetta reyndist síður en svo ótímabært því hann stoppaði ekki aksturinn fyrr en rafhlöðurnar voru búnar :) Ég man reyndar eftir því þegar ég fékk minn fyrsta og reyndar eina fjarstýrða bíl að gjöf frá foreldrum mínum. það var jólagjöf og ég held ég hafi verið 10 ára. Ég byrjaði auðvitað strax að leika mér með hann en fjörið entist stutt því pabbi hafði víst "prófað" á Þorláksmessu hvort hann virkaði ekki örugglega. Það próf ku hafa staðið lengur en til stóð og rafhlöðurnar kláruðust :) Á þessum tíma voru ALLAR verslanir lokaðar í 3-4 daga eftir Jólin svo þetta var visst áfall.

Óðinn er ekki sá eini í fjölskyldunni sem á afmæli því hún stóra (litla) systir mín á líka afmæli.

Til hamingju bæði tvö :)

Hérna eru þau bæði

Örlæti

Ég verð bara að koma opinberlega á framfæri þakklæti mínu til mannsins sem gerði skiptidílinn við fyrir Jólin og lét mig hafa 8 rjúpur í skiptum fyrir nokkra blaðsnepla. Það þýðir skv þessari frétt að hann hafi bara átt 10 eftir fyrir sig og sína. Samt þekkir þessi maður mig ekkert,....ótrúlegt örlæti

Smá eftirfylgni

Jæja, loksins gef ég mér tíma til að taka smá stöðumyndir af eldhúsinu en ég hef verið rukkaður töluvert um það.

Staðan er semsagt svona í dag:

Þetta er svo sannarlega breyting frá því sem áður var,....en þetta hefur gengið hægt og alveg sérstaklega hægt núna um Jólin þar sem börnin voru meira og minna hjá mér á Jólunum. Geri ekki mjög mikið þá. Jólin einkenndust eiginlega af álagi og pirringi yfir draslinu hérna hjá mér......en voru að flestu leyti alveg æðisleg bara,........og reyndar urðu Jólin allt öðruvísi að sumu leyti en ég hafði búist við

En semsagt,....nú er ég búinn að henda inn myndum og reyni að halda því áfram eftir því sem gengur. Rúsínan í pylsuendann, barstólarnir, verða svo tilbúnir um mánaðarmótin jan/feb og þá er þetta vonandi fullkomnað :)

Ég er við það að fá ógeð..............

.....á pizzum, hamborgurum og slíku bullfæði. En meðan eldhúsið er eins og það er, þá er víst fátt annað í matinn á kvöldin. Ég hlakka til að fá mér soðna ýsu, kjötbollur í brúnni sósu með kartöflumús og sultutaui ,..........Mmmmmmm :)))

Byrjaður að byggja upp veggina, búinn að múra og pússa niður gamla flísavegginn og byrjaður að byggja rammann í loftið. Ég eygi þá von að geta hætt snemma að vinna á morgun á skrifstofunni svo ég geti farið af krafti í þetta hérna en verður þó að segjast sem er að það er ekki beinlínis auðvelt að fara frá vinnunni á þessum tíma. En ég reyni það og er bara orðinn ansi bjartsýnn á að klára mjög mikið um helgina. Eftir sem áður tekur það viku að fá borðplötuna svo það er ljóst að verkið verður ekki klárt fyrr en 5 mínútur í Jól. En það verður þó klárt fyrir Jól :)

Svo er annað sem ég er líka búinn að fá ógeð á en það er draslið, rykið, drullan, óreiðan. Það er ekki alveg mitt uppáhald að hafa drasl heima hjá mér, eiginlega bara alls ekki. Og það get ég sagt að helgina 22. og 23. des eru allir sem vilja velkomnir að koma og þrífa með mér :))))))))

Svona er umhorfs heima hjá mér núna.......

Það er meira að segja erfitt að komast inní svefnherbergið